इटहरी उपमहानगरपालिकाको मेयर पदमा पदम अधिकारीले स्वतन्त्र उम्मेदवार बन्ने घोषणा गरेका छन् । आगामी वैशाख ३० गते हुन लागेको स्थानीय तहको निर्वाचनका लागि इटहरीको मेयरमा उनले उम्मेदवारी घोषणा गरेका हुन् ।
इटहरी स्थित चिया चौतारीमा शनिबार पत्रकार सम्मेलन गर्दै उनले उपमहानगरको सुपर समृद्धिको योजना बनाउने लक्ष्यसहित मेयरमा उमेद्वारी घोषणा गरेका हुन् । पत्रकार सम्मेलनमा उनले दलीय वितृष्णाबाट जनतालाई बचाउन आफू उम्मेदवार बन्न लागेको बताए ।
नेकपा एमालेबाट राजनैतिक यात्रा सुरु गरेका उनी पछिल्लो समय जनता समाजवादी पार्टीका नेता थिए । जसपा विभाजन भएपछि लोकतान्त्रिक समाजवादी तर्फ लागेका उनले आफू अहिले स्वतन्त्र भएको बताएका छन् ।
लोकतन्त्र जनताको जीवनमा अनुभूति हुनुपर्ने तर नेपालमा दलतन्त्रलाई नै लोकतन्त्रको रूपमा अभ्यास गरिएको अधिकारीद्वारा जारी विज्ञप्तिमा उल्लेख गरिएको छ । जसले गर्दा जनतामा लोकतन्त्र प्रति वितृष्णा जागेको र लोकतन्त्रको प्रत्याभूति दिलाउन आफू उम्मेदवार भएको उनले प्रस्ट पारेका छन् ।
इटहरीको कला साहित्य, पर्यटन, खेलकुद, लघु औद्योगिक एवम् थारु संस्कृतिको संरक्षणमा आफ्नो ध्यान जाने बाचा गर्दै अधिकारीले सुन्दर शहर बनाउने प्रस्ताव आफ्नो प्रतिवद्धता पत्र मार्फत ल्याउने बाचा विज्ञप्तीमा गरको छन् । सुपर समृद्धिको योजना बनाई कार्यान्वयन गर्ने र जसको लागी भू(उपयोग नीति, रोड बिस्तार, प्रकोप व्यवस्थापन, शिक्षा, स्वास्थ्य र समावेशिताको क्षेत्रमा सुधार ल्याउने उनको योजना छ । दलतन्त्रको हेजेमोनीको विकल्पमा आफू स्वतन्त्र उम्मेदवार भएको उनले बताए ।
